Канон Пресвятой Богородице, глас 1.

Тропарь, глас 1:

Гаврии́лу веща́вшу Тебе́, Де́во, ра́дуйся, / со гла́сом воплоща́шеся всех Влады́ка, / в Тебе́, святе́м киво́те, / я́коже рече́ пра́ведный Дави́д; / яви́лася еси́ ши́ршая Небе́с, / поноси́вши Зижди́теля Твоего́. / Сла́ва Все́льшемуся в Тя, / сла́ва Проше́дшему из Тебе́, / слава Свободи́вшему нас Рождество́м Твои́м.

Кано́н Пресвяте́й Богоро́дице, гла́с 1.

Пе́снь 1

Ирмо́с: Твоя́ победи́тельная десни́ца Боголе́пно в кре́пости просла́вися, та́ бо, Безсме́ртне, я́ко всемогу́щая, проти́вныя сотре́, изра́ильтяном пу́ть глубины́ новосоде́лавшая.

Припев: Пресвятая Богородице, спаси нас.

Струи́ мне́ сле́з душе́вных да́руй Всенепоро́чная, я́же исто́чник оставле́ния ро́ждши, грехо́вную скве́рну отмыва́юща, и во смире́нии жи́знь мою́ изводя́ща.

Превы́шши бы́сть Чи́стая тва́ри, Бо́га вопло́щши. Те́мже молю́ Тя́: от гно́я страсте́й возста́ви мя́, и к Боже́ственней высоте́ безстра́стия возведи́.

Слава: Ми́лостива ми́ яви́ся Чи́стая, в де́нь су́дный, молю́ся, вся́каго избавля́ющи мя́ стра́шнаго стоя́ния и лю́таго муче́ния, прибега́ющаго под кро́в Тво́й Пречи́стая Влады́чице.

И ныне: Мра́ком грехо́вным одержи́ма мя́, и па́дша Пречи́стая, воздви́гни, сле́з ту́чу даю́щи ми́, и́миже омы́ю скве́рная дела́: Тя́ бо еди́ну Засту́пницу и́мамы Богоро́дице.

Пе́снь 3

Ирмо́с: Еди́не ве́дый челове́ческаго существа́ не́мощь, и ми́лостивно в не́ вообра́жся: препоя́ши мя́ с высоты́ си́лою, е́же вопи́ти Тебе́ Святы́й: одушевле́нный хра́ме неизрече́нныя сла́вы Твоея́, Человеколю́бче.

Хра́м была́ еси́ Пречи́стая, все́ми ца́рствующаго, бы́вша мя́ верте́п душетле́нных разбо́йник, исхити́ от те́х озлобле́ния, и Боже́ственнаго Ду́ха чи́сто жили́ще яви́ мя. [Два́жды.]

Слава: Сле́з ми́ посли́ ту́чу, изсуша́ющу тече́ния лука́вых мои́х дея́ний, молю́ся, я́же благоутро́бия ро́ждши ти́хую пучи́ну, Христа́ Бо́га на́шего, Богоро́дице Де́во всепе́тая.

И ныне: Кре́пость на́м и сто́лп непоколеби́мь бу́ди Богора́дованная, и щи́т, и ору́жие непобеди́мое, мы́сленных вра́г полки́ от на́с возбраня́ющи, Богоро́дице Пречи́стая, ве́рою и любо́вию почита́ющих Тя́.

Седален, глас 1.

Се испо́лнися Иса́иино прорече́ние: / Де́ва бо родила́ еси́ / и по рождестве́, я́ко пре́жде рождества́, пребыла́ еси́, / Бог бо бе Рожде́йся, те́мже и естества́ новопресече́. / Но, о Богома́ти, / моле́ния Твои́х рабо́в, / в Твое́м хра́ме приноси́мая Тебе́, не пре́зри, / но я́ко Благоутро́бнаго Твои́ма рука́ма нося́щи, / на Твоя́ рабы́ умилосе́рдися / и моли́ спасти́ся душа́м на́шим.

Пе́снь 4

Ирмо́с: Го́ру Тя́ благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.

Бесо́вскими лестьми́ лю́те отвлачи́маго мя́ от за́поведей Бо́жиих, не пре́зри Блага́я: но уще́дри молю́ся, и того́ пре́лести покажи́ мя вы́шша, прибега́ющаго Пречи́стая к Твое́й ми́лости. [Два́жды.]

Слава: Еди́не Сы́й ми́лостивне Христе́ Бо́же, Тебе́ ро́ждшия моли́твами, на Тя́ упова́ющих поми́луй, и уще́дри, и к све́ту за́поведей Твои́х наста́ви, и ве́чныя жи́зни сподо́би.

И ныне: Усну́вша в сме́рть, и во гро́бе лежа́ща отча́яния Пречи́стая, око́вана желе́зы прегреше́ний мои́х, Твое́ю бо́дренною моли́твою воздви́гни, и к покая́нию испра́ви, молю́ся.

Пе́снь 5

Ирмо́с: Просвети́вый сия́нием прише́ствия Твоего́ Христе́, и освети́вый кресто́м Твои́м ми́ра концы́, сердца́ просвети́ све́том Твоего́ богоразу́мия, правосла́вно пою́щих Тя́.

Пото́цы мно́гих ми́ прегреше́ний приверго́шася, и хра́м души́ моея́ низложи́ша Пречи́стая: но я́же еси́ исправле́ние пра́отцем Богоро́дице, возста́ви мя́ раба́ Твоего́. [Два́жды.]

Слава: В тиме́нии мя́ страсте́й угле́бнувша окая́ннаго, и бу́рею мно́гих согреше́ний потопля́ема, ру́ку пода́вши влады́чице, возведи́ мя, и ко приста́нищу покая́ния напра́ви.

И ныне: Душе́вных ми́ скве́рн очище́ние да́руй, и плотски́х мя́ боле́зней исцели́ молю́ся, и от обдержа́щаго лю́таго уны́ния премени́ моли́твами Твои́ми.

Пе́снь 6

Ирмо́с: Обы́де на́с после́дняя бе́здна, не́сть избавля́яй, вмени́хомся я́ко о́вцы заколе́ния, спаси́ лю́ди Твоя́ Бо́же на́ш: Ты́ бо кре́пость немощству́ющих и исправле́ние.

Рукописа́ние Пречи́стая, прегреше́ний мои́х копие́м расто́ргни, ро́ждшагося ра́ди из безсе́меннаго Твоего́ чре́ва: в кни́зе мя́ написа́ти сподо́би избра́нных, прибега́ющаго к Боже́ственному покро́ву Твоему́. [Два́жды.]

Слава: Очи́сти Христе́, рабы́ Твоя́ моли́твами ро́ждшия Тя́, и низпосли́ я́ко еди́н бла́г согреше́ний проще́ние: Ты́ бо еси́ Спа́с, и Изба́витель все́м наде́ющымся на Тя́.

И ныне: Умерщвле́на мя́ страстьми́ Пречи́стая Де́во, я́же Жизнода́вца ро́ждшая, оживи́ ны́не Твои́ми моли́твами, и победи́теля яви́ мя на врага́ зла́го: Тя́ бо еди́ну и́мамы к Бо́гу Помо́щницу на́шу.

Кондак, глас 6:

Предстáтельство христиа́н непосты́дное, / ходáтайство ко Творцу́ непрело́жное, / не пре́зри гре́шных моле́ний глáсы, / но предвари́, я́ко Благáя, на по́мощь нас, / ве́рно зову́щих Ти; / ускори́ на моли́тву, и потщи́ся на умоле́ние, / предстáтельствующи при́сно, Богоро́дице, чту́щих Тя.

Икос:

Простри́ дла́ни Твоя́, и́миже всех Влады́ку я́ко Младе́нца прия́ла еси́ за мно́жество бла́гости, / не оста́ви нас, всегда́ наде́ющихся на Тя, бо́дренною Твое́ю моли́твою, / и неисче́тною просты́нею уще́дри нас, / и пода́ждь душа́м на́шим милосе́рдие Твое́, во ве́ки источа́ющи, / Тебе́ бо и́мамы гре́шнии Засту́пницу от находя́щих на ны бед и зол. / Но я́ко иму́щи милосе́рдия щедро́ты, / ускори́ на моли́тву и потщи́ся на умоле́ние, / предста́тельствующи при́сно, Богоро́дице, чту́щих Тя.

Пе́снь 7

Ирмо́с: Тебе́ у́мную Богоро́дице, пе́щь разсмотря́ем ве́рнии: я́коже бо о́троки спасе́ три́ Превозноси́мый, ми́р обнови́ во чре́ве Твое́м всеце́л, хва́льный отце́в Бо́г, и препросла́влен.

Я́ко исто́чника жи́зни ро́ждшая, уме́ршую мою́ ду́шу живоно́сною десни́цею, Пречи́стая, воскреси́, и вопи́ти сподо́би во умиле́нии се́рдца моего́: прехва́льный отце́в Бо́же благослове́н еси́. [Два́жды.]

Слава: Но́в Ада́м от чи́стых крове́й Твои́х бы́ти изво́лил е́сть, и́же пре́жде ве́к Бо́г. Его́же ны́не моли́, обетша́вшаго мя́ обнови́ти, зову́ща: прехва́льный оте́ц на́ших Бо́же благослове́н еси́.

И ныне: Гне́ва путе́м вра́г приходя́, восхи́тити хотя́ неща́дно ду́шу мою́ смире́нную, сего́ сове́ты, Пречи́стая, разруши́: и пою́ща мя́ уще́дри: восхваля́емый отце́в Бо́же благослове́н еси́.

Пе́снь 8

Ирмо́с: В пещи́ о́троцы изра́илевы, я́коже в горни́ле добро́тою благоче́стия, чисте́е зла́та блеща́хуся, глаго́люще: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Просвети́ ми о́чи серде́чныя, я́же две́рь све́та чи́стая, о́блак страсте́й, и тьму́ глубо́кую разгоня́ющи, да пою́: вся́ дела́ Госпо́дня Го́спода по́йте, и превозноси́те его́ во ве́ки. [Два́жды.]

Слава: О все́х Влады́чице чи́стая, не преста́й моля́щися Тебе́ призыва́ющих я́ко Ма́терь Бо́жию, Де́во всенепоро́чная, и вопию́щих: благослови́те вся́ дела́ Госпо́дня Го́спода, по́йте и превозноси́те Его́ во ве́ки.

И ныне: Спасе́ния вину́ Христа́ неизрече́нно ро́ждшая, моли́ о все́х вопию́щих приле́жно Де́во всепе́тая: благослови́те вся́ дела́ Госпо́дня Го́спода, по́йте и превозноси́те Его́ во ве́ки.

Пе́снь 9

Ирмо́с: О́браз чи́стаго рождества́ Твоего́ огнепали́мая купина́ показа́ неопа́льная: и ны́не на на́с напа́стей свире́пеющую угаси́ти мо́лимся пе́щь, да Тя́ Богоро́дице непреста́нно велича́ем.

Возми́ тя́жкое бре́мя мои́х согреше́ний, Богоро́дице всепе́тая, и легча́йшее и́го Сы́на и Бо́га Твоего́ сподо́би мя́ носи́ти, и по стези́ ше́ствовати к го́рнему соверше́нию возводя́щей. [Два́жды.]

Слава: Трепе́щу помышля́я, Всенепоро́чная, стра́шный де́нь прише́ствия Христо́ва: вся́ бо жи́знь моя́ во гресе́х сконча́ся, и страсте́й душа́ моя́ испо́лнися. но уще́дри мя́ и вся́каго изба́ви тогда́ осужде́ния.

И ныне: Приими́ Пречи́стая Влады́чице, непотре́бнаго раба́ Твоего́ моле́ния, и души́ моея́ и те́ла смуще́ние во глубо́кую тишину́ преложи́: я́ко да Тя́ велича́ю спаса́емь.

Молитва

О, Пресвятая Владычице Богородице, небесе и земли Царице! Призри на ны, грешныя и недостойныя рабы Твоя, и умоли Сына Твоего Христа Бога нашего, да оградит ны свыше силою Своею, еже навсегда сохраненым быти от всех искушений вражиих и прелестей бесовских. Ты, о Всемилостивая Госпоже Дево Богородице, покрый ны всеблагим Твоим покровом. Спасай убо, о Пресвятая Дево Богородительнице, весь род христианский, и вся с верою приходящия и поклоняющияся Тебе, славящия же Пречистую Троицу, Отца и Сына и Святаго Духа, и Твое милостивное со святыми предстательство, ныне и присно и во веки веков. Аминь.